CEBU, Philippines - Gipamatud-an ni kanhi WBO super flyweight champion Marvin ‘Marvelous’ Sonsona (16-1, 13KOs) nga andam na siyang motaak sa dalan paingun sa laing world title shot human sa iyang kontrobersiyal nga fifth round TKO nga kadaugan batok ni Carlos “El Flaco” Fulgencio (19-6, 12KOs) sa Dominican Republic sa main event sa “Pinoy Knockout I” sa miaging gabii didto sa Hoops Dome sa Brgy.Gun-ob, Lapu-Lapu City.
Usa ka hait nga left uppercut ang gipatugpa ni Sonsona ngadto sa suwang ni Fulgencio kinsa miluhod ibabaw sa ring, apan dihang miaksyon og bangun si Fulgencio kalit lang gihunong ni referee Tony Pesons ang away sa 1:41 sa round five.
Si Fulgencio dugay nga mibarug og naghuwat pa nga mahuwasan, apan giundang ni Pesons ang away tungod kay pakyas kini pagtubag dayun sa iyang ihap.
Wala mahimuot niini ang kampo ni Fulgencio tungod kay alang nila anaa pay kusug ang ilang boksidor nga mopadayun sa away.
Kini usab ang gibati ni SGG Promotions big boss Sammy Gello-ani kinsa nagtuo nga ‘premature’ ang tawag ni Pesons ug daghan ang nabitin sa away.
“Honestly I am impressed and happy with Marvin’s performance but I think the stoppage was premature,” matud pa ni Gello-ani. “Kaya pa ni Fulgencio nga mopadayon sa away, bati kay hilaw ang stoppage og nabitin ang mga fans.”
Hinuon bisan pa niini, si Gello-ani mibilib gihapon ni Sonsona kinsa iyang ilakip sa umaabot nga fight card sa Mayo 13 didto sa Waterfront Hotel diin main event si IBF light flyweight champion Johnriel Casimero kinsa modepensa sa iyang bakus batok sa Mehikanong si Sammy Gutierrez.
Ang 21-anyos nga si Sonsona mipahibalo usab nga musaka siya sa mas bug-at nga featherweight division og andam siya makigsangka sa mga dagkung pangalan lakip na si Rey ‘Boom Boom’ Bautista sa ALA Boxing Gym.
“Komportable rako sa featherweight ug ready ko bisan kinsa akong kontrahon bisag si Boom Boom,”matud pa niya.
Sa supporting bout, ang undefeated nga si Froilan ‘The Sniper’ Saludar (15-0, 11KOs) midaog pinaagi sa unanimous decision batok ni Mexican Alejandro Morales (13-2, 7KOs) aron depensaan ang WBO Youth and Asia- Pacific flyweight title.
Samtang si Mark Anthony Geraldo (23-4, 10KOs) sa Velancia, Bukidnon miilog sa WBO Asia-Pacific super flyweight title ni Jerwin Ancajas (13-1, 5KOs) ug si Adones Cabalquinto (11-0, 8KOs) miangkon sa bakanteng Philippine light welterweight title human gilupig sa puntos si Dan Nazareno (16-8, 12KOs). - BANAT NEWS