CEBU, Philippines - Makasaksi na sab og laing kulbahinam nga aksiyon ang mga mahiligon og Mixed Martial Arts (MMA) dihang gilusad sa Yaw-Yan ArDigma Martial Arts Federation Inc. ang Ground and Pound VI nga uloha'g "Invicible" sa Hulyo 14 diha sa Cebu Coliseum.
Lahi sa mga nangaging edisyon, ang torneyo nga giila sa Games and Amusements Board (GAB), wala nay kickboxing event ug mopukos na lang sa MMA.
"Human sa duha ka tuig masundan na gyud ang Ground and Pound series. Excited mi kay lahi sa miaging event, mo-focus mi sa MMA," matud pa ni Yaw-Yan ArDigma Cebu founder and Vis-Min director Master Benigno 'Ekin' R. Caniga Jr. atol sa press conference sa miaging gabii didto sa Yaw-Yan ArDigma headquarters.
Laing tumong ni Caniga, gawas sa pag-promote sa MMA sa Sugbu ug pagtudlo'g self-defense mao ang pagpakita nga ang martial arts usa sab ka instrumento alang sa maayong panglawas.
Gawas sa host Yaw-Yan ArDigma, laing mga fight clubs nga mosalmot naglakip sa Yaw-Yan Musang ug Durex Dragon Kickboxing Club sa Lapu-Lapu City, Soma Kickboxing Club sa Mandaue City, Negros Top Team, Butuan Extreme, MUMA Boxing Club sa Cagayan De Oro City ug Tenbudo MMA sa Malaysia.
Sa laing bahin, ang Yaw-Yan ArDigma pormal nga milusad sa ilang summer clinic nga sugdan sa Abril 2 didto sa ilang headquarters nga nahimutang sa 4th floor sa Coast Pacific Downtown Center atbang sa UC-main campus sa dalan Sanciangko, ning siyudad.
Lakip sa mga kurso nga gitanyag mao ang arnis, boxing fitness, Yaw-Yan combat for self-defense, Yaw-Yan ArDigma system ug MMA.
Sugdan ang enrollment sa Marso 26. Alang sa dugang mga pangutana, mahimong motawag sa 0932-4524999. (BANAT SPORTS)