Cebu andam na mo-host sa PRISAA Nationals

CEBU, Philippines - Gibana-banang moabot sa 6 mil ka mga atleta ang maghugop dinhi sa Sugbu alang sa Private Schools Athletics Association (PRISAA) National Collegiate Games 2012 nga gikatakda sa Abril 22-28.

Ikaduha na kining higayon nga ang Sugbu mo-host sa PRISAA human sa malampusong pagpahigayon sa maong kalihukan niadtong 2002.

Mangulo sa tinuig nga kompetisyon mao ang defending champion Region 7. Lain pang mosalmot naglakip sa Region 1, 2, 3, 4-A, 4-B, 5, 6, 8, 9, 10, 11, CAR, CARAGA, ARMM-A ug ARMM-B.

Ang mga atleta magtigi sa nagkadaiyang sports disciplines sama sa basketball, beach volleyball, football, softball, volleyball, athletics, badminton, boxing, chess, dancesport, karatedo, lawn tennis, swimming, table tennis, taekwondo ug   cultural competitions sama sa vocal solo ug Miss Mutya.

Ang Region 7 mikampiyon sa labing unang higayon sa miaging tuig didto sa Zamboanga. Mihakot sila og 70 ka golds, 53 ka silver ug 67 ka bronze medals.

Atol sa launching ug press conference kagahapon didto sa University of San Jose-Recoletos (USJ-R) president’s conference room, gipadayag sa mga opisyales sa PRISAA Region 7 ang ilang kaandam nga mo-host sa dakung kalihukan.

"We are looking forward to a successful staging of PRISAA here in Cebu," matud pa ni PRISAA regional head Fr.Vicente Uy, SVD. "Hopefully this PRISAA Games will be the best ever."

Sa iyang bahin, si Commission on Higher Education (CHED) Director Amelia Biglete malaumon nga pinaagi sa PRISAA, makapadayon sila pagkaplag og mga atleta nga adunay potensyal nga morepresentar unya sa nasud sa mga international events.

"Hopefully with this event we can have a pool of athletes that can bring honor and prestige to our country someday," matud pa niya.  (BANAT SPORTS)