CEBU, Philippines - Inay mobati og kabalaka, nagpanikad na hinuon karon si reigning OPBF flyweight champion Rocky ‘Road Warrior’ Fuentes sa nagsingabot niyang sangka batok sa Mehikanong si Javier ‘El Chivero” Franco sa Pinoy Pride XIII karong Marso 24 didto sa Waterfront Cebu City Hotel and Casino.
Si Fuentes moaway ni Franco sa supporting bout alang sa WBO Asia-Pacific bantamweight title fight tali ni ALA Gym world title contender AJ ‘Bazooka’ Banal ug Raul’ El Bule’ Hidalgo sa Mexico.
Ang mga ALA boys mipakita nga anaa na sila sa hustong kondisyon atol sa public sparring niadtong miaging gabii didto sa Cebu IT Park.
Ang garbo sa Brgy.Mambaling, Cebu City nga si Fuentes nagkanayon nga naghinam-hinam na siya sa iyang away tungod kay sa labing unang higayun usa ka Mehikano ang iyang ikaatubang ibabaw sa ring.
“Mas ganahan ko run kay Mexican akoang kontra, mas ganado ko sa training kay kahibaw nata lig-on kontrahon ang mga Mehikano,” matud pa ni Fuentes.
Sa iyang bahin, si Banal kinsa maningkamot mudaog batok ni Hidalgo aron masegurado ang iyang kahigayunan alang sa usa ka world title shot, mibutyag nga anaa na sa sento porsiyento ang iyang kaandam paingun sa away.
“Ready na gyud ko 100 percent,” matud pa niya. “Light training nalang ako gibuhat run, gipaningkamotan gyud nako sa training aron makahatag ko og nindot nga away ug aron mapakita sad nako sa akong mga fans nga ready nako para title fight.”
Laing ALA fighters nga mobida sa undercards mao sila si Albert "The Prince" Pagara ug Arthur Villanueva. Si Pagara moaway ni Thai Phupha Por Nobnom, samtang si Villanueva makigsangka ni Rey Migreño sa La Trinidad , Benguet. - BANAT NEWS