Dark ug Light All-Star nagtabla

CEBU, Philippines - Misangpot sa panagtabla ang resulta sa duwa tali sa Dark ug sa Light All-Star teams ngadto sa iskor 68-all stalemate atol sa ilang F.Llamas Youth Association (FYA) exhibition game sa miaging semana isip intermission sa ilang pagpangandam sa semifinal ug final game karong semanaha didto sa barangay Tisa gym, ning dakbayan.

May higayon untang modaug ang Dark apan wala makumpleto ni Mclain Alquino ang iya untang three-point play opportunity tungod kay misipyat siya sa iyang free throw human siya makakubit og foul ug nakapasulod sa iyang lay-up nga maoy mitabla sa duwa sa 68-all sa kataposang sayis segundos ang oras.

Gipahigayon ang All-Star game aron maoy molamas sa FYA semifinal round ug knockout finals.

Miposa og 15 puntos si Alquino alang sa Dark All-Star kinsa gipangulohan ni Tata Laborte pinaagi sa iyang 16 puntos ug silang Jaz Sydiongco ug Dondon Cadungog midugang og 13 ug 11 puntos, matag usa.

Silang Michael Garcia, Junrey Arreglo ug Ranel Patalita maoy nangu sa Light All-Star sa ilang eskalerang puntos gikan sa 13, 12 ug 11 matag usa.

Sa laing bahin atol sa mga side events, ang kanhi UC Webmaster Daniel Enriquez sa Grand & Jai maoy midaug sa Slam Dunk contest samtang ang iyang teammate gikan sa Grand & Jai nga si Arreglo maoy bag-ong three-point king.

Ang tandem nilang Paul Cañete ug Calbert Malicay gikan sa natagak nga Leo Lauron team, maoy nanghawud sa two-ball competition diin ilang gipukan ang laing lima ka paresan sa mga karibal nga teams.

Si Joglyn Abella sa Steven Jocabz maoy midaug sa Skills Challenge.

Sugdan karon ang FYA semifinal diin ang no. 1 seed nga Grand & Jai makigsangka batok sa fourth-seed Chariz & Caleigh samtang ang no. 2 seed Simple Likes makigtakos batok sa no. 3 Steven Jocabz ug ang modaug maoy mag-abot sa finals samtang ang mapilde maoy mag-ilog alang sa ikatulong pwesto.           .

Puntos matag usa:

Dark (68) – Laborte 16, Alquino 15, Sydiongco 13, Cadungog 11, Villaver 6, Sabalande 4, Laurente 2

Light (68) – Garcia 13, Arreglo 12, Patalita 11, Lavandero 9, Codilla 6, Baldago 6, Cajucson 4, Enriquez 3.  - BANAT NEWS