Chang dinaig si Orcollo sa Face Off Series
MANILA, Philippines - Nagpatuloy ang pagdomina ng Team Asia laban sa ipinagmamalaking pool players ng bansa nang manalo si Chang Jung-lin ng Chinese-Taipei laban kay Dennis Orcollo, 9-8, sa idinaos na 2012 Philippine Bigtime Billiards (PBB) Face Off Series noong Sabado ng gabi sa PAGCOR Airport Casino sa Parañaque City.
Bumangon si Lin, nagkampeon sa 2012 World 8-ball Championship, mula sa 0-4 at 6-8 iskor upang katampukan ang mahusay na paglalaro kontra kay Orcollo na naghari sa World 8-ball noong 2011.
Kahit si Orcollo ay hindi makapaniwala sa nangyari sa kanya sa race-to-9, winner's breack format.
“Abot-kamay ko na ang panalo sa 8-6 iskor pero nag-scratch ako at hindi na ako pinatira pa ni Chan. Talaga siguro hindi sa akin ang laban,” katuwiran ni Orcollo.
Halagang $5,000 ang premyong napasakamay ni Chang bukod pa sa pagbibigay ng 3-1 lamang sa Team Asia laban sa Pilipinas.
Magpapatuloy ang duwelo ng dalawang koponan sa Marso 17 sa pagkikita nina Yang Ching-shun ng Taipei at Carlo Biado.
Magkikita sina Yang at Bustamante sa Marso 24 at sina Chang-Yu Long ng Taiwan at Ronato Alcano sa Marso 31.
- Latest
- Trending
