Global Swimarathon record breaker?

CEBU, Philippines - Gitambongan og labing menos 4,000 ka mga swimmers ang bag-o lang gipahigayon nga Rotary Club of Talisay-Cebu "Swimarathon kaniadtong Pebrero 25 didto sa YMCA pool ug usa na kini ka world record (unofficially) tungod kay nalabwan na niini ang kasamtangang world record nga adunay 2,533 ka mga swimming nga nagdungan og langoy sa usa lang ka swimming event.

Sumala pa ni Rotary Club of Talisay-Cebu president Architect April Dequito nga nakig-alayon sila karon sa mga opisyales sa Rotary Club of Grantham, United Kingdom kinsa maoy motunol sa mga dokumento ngadto sa buhatan sa Guiness Book of World Records.

Dili pa hinoon kini opisyal hangtod dili pa mogawas ang pahibalo gikan sa Guiness apan kung ang labaw lang ang pasikaran, mas labaw na sila og usa ka libo ka swimmers.

Ang Rotary Global Swimarathon gipahigayon isip usa ka fund-raising campaign aron hingpit masumpo ang polio nga nagka-grabe na ang kaso sa tibuok kalibotan.

Matod pa ni Archt. Dequito nga aron mahimo silang kwalipikado alang sa World Record attempt, ang mga swimmers molangoy lang og distansiya nga 100 ka metros nga walay pahuway sulod sa usa ka oras.

Ang event chairman nga si Roger Graves nagkanayon sa usa nila ka tigum "it all started as a bit of a joke to hold a Global Swimarathon but now the reality is setting in and we hope to achieve the following across the world."

Adunay upat ka importanteng tinguha ang Rotary Club of Talisay-Cebu alang sa pagpahigayon sa Global Swimarathon ug kini mao ang mosunod; 1) ang pagkulit ug bag-ong World Record alang sa labing daghang mosalmot nga swimmers, 2) ang pagpangita ug pundo aron itabang sa pagsumpo sa polio, 3) ang pagpa-usbaw sa pagpakabana sa Rotary ug 4) ang pagpabiling himsug ang kalawasan pinaagi sa paglangoy.

TAng mga tigpasiugda sa maong Swimarathon nagpasalamat sa mga sakop sa lokal nga media sa ilang pagtabang pagsangyaw sa maong kalihokan.  

Ang mga misalmot sa Swimarathon naggikan sa mga nasud sa New Zealand, South Africa, Hong Kong, Portugal, United Kingdom ug host Philippines. - BANAT NEWS