Tagbilaran City, Philippines - Kompiyansa ang beteranong Mehikano nga si Genaro 'Poblanito' Garcia nga ang iyang dakung pabor sa kasinatian maoy mopadaog kaniya batok ni ALA Boxing Gym fighter Rey 'Boom Boom' Bautista sa main event sa "Pinoy Pride XII: Bakbakan sa Bohol" ugma sa gabii didto sa Carlos P. Garcia Sports Complex.
"I came here to win," matud pa ni Garcia, atol sa final press conference kagahapon didto sa Bohol Tropics Resort. "I’m going to fill Boom-Boom with attack in the early rounds until I knock him out."
Bisan wala kaniya ang height advantage, si Garcia adunay katungod nga moangkon og kadaugan tungod kay walo na ka world champions ang iyang gikasangka lakip na niini ang iyang second round knockout nga kadaugan batok ni former Mexican world champion Rafael Marquez niadtong Nobiyembre 2000.
Ang 34-anyos nga si Garcia adunay gitas-on nga 5'4" mas mubo og duha ka inches ni Bautista.
"I fought taller guys than him (Bautista), but I will use my experience to beat him," dugang pa niya.
Sa iyang bahin, si ALA Promotions CEO Michael Aldeguer miangkon nga kuyaw nga kontra si Garcia batok ni Bautista.
"This could be one of his (Bautista) toughest fight," matud pa ni Aldeguer. "This fight will tell it all, maybe after this we will look for a possibility of title eliminator."
Apan si Bautista, ang ranked No.1 sa International Boxing Federation (IBF) mipasalig og impresibong daog ngadto sa iyang mga katagilungsod. "Ipakita nako nila nga daku kayo akong gusto nga mahatagan sila (Boholanos) og garbo ilabi na nga taga Bohol ko."
Sa supporting bouts, ang rising super bantamweight prospect nga si Genesis 'Azukal' Servania (16-0, 6KOs) moharong sa Kenyan nga si Nick Otieno (21-7 9KOs), samtang si light welterweight Jason 'El Niño' Pagara (27-2, 16KOs) makigsangka ni Indonesian Frans Yarangga (10-1, 7KOs).
Moaway usab ang ALA veteran nga si Michael 'Bruce Lee' Domingo (43-16, 22KOs) batok ni Marvin Tampus (27-14, 18KOs). (BANAT SPORTS)