UC andam na sa NSBC

CEBU, Philippines - Miabot na didto sa Dagupan City ang seniors champion sa Cebu Schools Athletic Foundation, Inc. (CESAFI) nga University of Cebu (UC) Webmasters alang sa pagbukas sa 64th National Students Basketball Championship (NSBC) 2012 nga giila sab isip National Inter-Secondary and National Inter-Collegiate Championships didto sa Dagupan City, Pangasinan.

 Ang pambato sa Davao City nga Jose Maria College maoy kataposang nakakuha og luna alang sa maong torneyo ug sila maoy ikanapulo nga team nga mosalida didto sugod karon hangtod sa Marso 3.

Ang torneyo gipaluyohan sa Basketball Association of the Philippines (BAP) nga dugay na kaayong nagdumala sa basketball sa Pilipinas sukad pa niadtong uwahing bahin sa 1940 human makakuha og kagawasan ang atong nasud gikan sa mga Amerikano.

“It is with deep pride that Region 1 will host the NSBC in Dagupan City for the first time. We are excited to work hand in hand with your organizing committee members led by Renato “Jack” Vidal, Noel Osting and Seato Gonimil,” nagkanayon si BAP president Sen. Antonio Trillanes IV kinsa mibisita na karon sa Dagupan City aron makigkita sa mga opisyales ug mga sakop sa BAP Region 1 ubos sa ilang director nga si Vice Mayor Belen T. Fernandez kinsa mihatag sa iyang kinatibuk-ang suporta alang sa kalamposan sa NSBC didto sa ilang dakbayan.

Adunay 10 ka collegiate team ug unom ka high school teams ang mosalmot sa maong torneyo sumala pa ni BAP secretary-general Graham C. Lim.    

Ang 2012 NSBC maoy qualifying tournament ngadto sa 9th Asian University Basketball Championship for Men didto sa Kuala Lumpur, Malaysia unya sa Hulyo ning tuiga diin mopaluyo sab niini ang Agri Nurture Inc (ANI), Healthy Options, Sinmag, Universal Dragon Seed Corporation ug ang Dagupan City ubos ni Mayor Benjamin Lim.

Ang usa sa collegiate teams nga mosalmot mao ang CESAFI chmpion University of Cebu (UC) Webmasters ug ang mga high schools nga mosalmot mao ang mosunod; Bukidnon Faith Christian Academy, Divine World Academy, Malay Boracay National High School, Guagua National College ug Queen Ann School.

Mi-atras ang CESAFI high school champion Universitry of the Visayas (UV) Baby Lancers tungod kay ilang nahibaw-an nga walay team gikan sa NCR nga mo-apil ug dili kaayo "challenging" ang maong torneyo alang kanila.

Gawas sa UC ug JMC, ang ubang mga college teams nga mosalmot mao ang Philippine Christian University, Lyceum of the Philippines University, University of Luzon, Saint Louis University, San Pedro College Business Administration, Emilio Aguinaldo College ug ang UCAA Champion Philippine School Business Administration.  - BANAT NEWS