Bolts Gilamoy Sa Tigers

CEBU, Philippines - Wala musalir ang pag-ilis og import sa Meralco Bolts dihang gikunis-kunis sila sa Powerade Tigers, 94-82, sa nagpadayung aksiyon sa PBA Commissioner’s Cup kagabii didto sa Smart Araneta Coliseum.

Ang Bolts (1-3) miparada sa bag-o nilang import nga si Earl Barron nga maoy ilang paglaum aron malikayan ang duha ka sunod-sunod nga kapildehan, apan pakyas gihapon sila dihang gikastigo sila sa Tigers kinsa kasamtangang nag-una karon sa standing sa ilang 2-0 win-loss record.

Ang 7-footer nga si Barron kinsa maoy mihulip ni Jarrid Famous mipakita hinuon og impresibong duwa sa iyang 22 puntos ug 17 ka rebounds, apan dili kini igo aron masumpo ang PBA Philippine Cup finalist nga Powerade.

Nakontrolar sa Meralco ang first-half, apan wala sila kaarte sa final period diin mihimo og rally ang Powerade sa pagpangulo ni reigning ‘Best Player of the Conference’ Gary David kinsa maoy leading scorer sa iyang 30 puntos.

Kini ang ika-16 nga sunod-sunod nga duwa ni David nga mirehistro siya og 24 puntos pataas alang sa Powerade.

Gawas ni David, mikiat usab sa opensa si Marcio Lassiter kinsa mipasulod sa iyang mga krusyal nga tira sa final period ug mitapos sa duwa sa iyang 19 puntos ug pito ka assists.

Nausik usab ang 19 puntos ni Gaby Espinas alang sa Meralco.  - BANAT NEWS