CEBU, Philippines - Miagi pa og double overtime ang TigerBadz una nila mapalagpot ang Saymer, 93-87 sa Game-3 sa ilang "best-of-three" finals aron langkaton ang titulo sa Buaya Seniors Basketball Association (BSBA) Lauro's Cup niadtong Domingo didto sa Brgy. Buaya open court sa Lapu-Lapu City.
Pildihonon unta ang TigerBadz nilang team owners Badz Casinillo ug Tiger Inot kay naglabaw ang Saymer og tres puntos sa himalatyong oras, 66-69, apan naanghelan pa kini dihang nagmilagro si Lando Baricuatro pinaagi sa pagpasud sa iyang 3-pointer aron tablahon ang iskor, 69-all ug mihatod sa duwa ngadto sa unang overtime.
Sa dugang singko minutos, si Dindo dela Rama nga gisakyan og buynas sa overtime maoy mipas-an sa opensa sa TigerBadz ni coach James Anton Jr. hinungdan nga nailog nila ang momentum.
Nagkagamay ang oras, naglami sab ang aksiyon ug nagpinus-anay og mga puntos ang duha ka kampo.
Nagpaabot na lang unta ang TigerBadz og pipila ka segundos aron maangkon na nila ang daog human miabante og tres puntos, 80-77, apan ang Saymer ni team owner Christopher Sayson mao na sab ang nakatabla, 80-all human nakompleto ni Alan Nabua ang iyang three-point play sa nahabiling 15 segundos hinungdan nga nalugwayan ang duwa sa makaduha ka higayon.
Sa second overtime, nagmabinantayon na ang TigerBadz ug wala na nila hatagi og higayon ang Saymer nga makasikit pa.
Sila si Bryan Canoy ug Ruel Micabalo maoy mikumbati og maayo sa ikaduhang overtime alang sa TigerBadz. Ang duha parehong miposte og 14 puntos, apan si Canoy maoy napiling MVP tungod sa maayo niyang performance sa tibuok liga.
Ang Saymer gipangulohan ni Tata Igot, kinsa milaras og 17 puntos, samtang si Nabua nga adunay 15 puntos.
Nagmalampuson ang liga tungod sa suporta sa Buaya Barangay Council ubos sa liderato ni Capt. Lauro Soroño, Rolly dela Pieza, JB Sportswear, Dennis Godinez, Felix Godinez ug Titing Soroño.
PUNTOS MATAG USA
TIGERBADZ (93) - Canoy 14, Micabalo 14, Dela Rama 12, Casinillo 11, Baricuatro 9, Mepieza 7, Perez 4, Cosep 4, Anhao 4, Hosmil 3, Jimenez 3, Labadan 2
SAYMER (87) - Igot 17, A. Nabua 15, Sayson 9, Fernandez 8, Augosto 7, Gepega 7, Barera 6, Nabua 6, Godinez 5, Lara 3, Genturales 2, Guido 2 (BANAT SPORTS)