NU Bulldogs hinugot ang youth team standout
MANILA, Philippines - Hinugot ng National University si Philippine youth team standout Rodolfo “J-Jay” Alejandro III para palakasin ang kanilang kampanya sa darating na UAAP men’s basketball tournament.
Si Alejandro, miyembro ng national under-16 team na umabante sa semifinal round ng nakaraang FIBA Asia U16 tournament sa Vietnam, ang inaasahang makakatambal ni Bobby Ray Parks Jr.
“He’s a very talented player and we’re glad to have him under our tutelage,” sabi ni Bulldogs’ head coach Eric Altamirano sa six-foot guard na si Alejandro.
Nagtala si Alejandro ng average na league-best 25.4 points, tampok dito ang 46 points sa isang laro, para sa Malayan High School (Mapua) Red Robins sa juniors division ng nakaraang NCAA season.
Bukod dito, naglista rin si Alejandro ng mga averages na 4.4 assists, 4.7 rebounds at 1.8 steals para sa Red Robins.
Umiskor ang 16-anyos na si Alejandro ng 34 points para sa under-16 squad laban sa Japan sa FIBA Asia tournament noong Oktubre ng 2011 kung saan siya nagposte ng average na 12.5 points.
- Latest
- Trending
