Rama boys nakabihag vs. Datche

CEBU, Philippines - Gipukan sa Rama Boys quintet pinangulohan sa ilang skipper ug triggerman Jingjing Rama ang Datche Automation System nga gipanag-iya ni Bryan Tan sa iskor, 91-85 kaniadtong Miyerkules atol sa usa ka friendly showdown didto sa Vicente Sotto Memorial gym sa barangay Punta Princesa, ning dakbayan.

Si Rama maoy nagtimon sa iyang team ug sayo kaayo silang miposte'g 23-11 nga labaw dihang mi-arte silang Noel Talas ug Fiel Pardenilla sa sayong bahin sa duwa ug pinaagi sa iyang mga fancy assists, kanunay silang naglabaw og double figures hangtod ngadto sa second ug third periods.

Miamot og 12 puntos si Rama alang sa maong kadaugan ug ang ig-agaw nga si Chris Rama miposa og 10 puntos. Siya sab ang mihuygo og maayo dihang milabaw sila'g 13 puntos, 63-50 pagsugod sa fourth quarter.

Mihulga unta ang Datche players didto sa fourth period dihang ilang gipapas ang biya ginamit ang 35-28 nga scoring rally luyo sa paningkamot nilang Elvis Federico ug Charlie Petiluna apan wala sila molampos pagsakmit sa liderato tungod kay kutob lang sa sayis puntos ang ilang pagsikit ug nagpunay sab og sukli ang Rama Boys gawas pa sa pagpahamtang ug mas hugot nga depensa.

Miburak og 18 puntos si Talas aron maoy mangu sa opensa sa Rama Boys samtang si Fiel Pardenilla midugang og 11 puntos.

Silang Federico ug Petiluna mibahug og 21 ug 20 puntos matag usa alang sa Datche samtang si Yoyong Cabanlit miposa og 12 puntos.

 Puntos matag usa:

RAMA BOYS (91)- Talas 18, J. Rama 12, Pardenilla 11, C. Rama 10, J. Libre 9,

Cabañero 8, Ronquillo 6, Go 5, Gabut 4, R. Libre 4, Cinco 4, Gaw 2.

DATCHE (85)- Federico 21, Petiluna 20, Cabanlit 12, Pepito 8, Dumo 7, Magno 6, Wenceslao 6, Rama 5.  - BANAT NEWS