Torre mipaundang ni Esfra sa FGC 3

CEBU, Philippines - Napanalipdan ni Victor 'Gladiator' Torre sa Fight Club Bacolod ang iyang limpyong rekord dihang gipilde niya si Ramilo 'Mad Dog' Esfra sa Arcomjukai-Mandaue sa San Mig Strong Ice-Fight Ground Championship (FGC) 3 sa miaging gabii didto sa Mandaue City Cultural and Sports Complex.

Gawas nga mikulit sa iyang ikawalong sunod-sunod nga daog sa Mixed Martial Arts (MMA), si Torre milangkat usab sa bakanteng FGC lightweight title.

Gigamit ni Torre ang iyang taas nga kasinatian sa Brazilian Jiu-jitsu aron dakpon sa usa ka rare naked choke si Esfra, kinsa mi-tap-out sa 3:13 sa ikaduhang round.

Si Esfra nga nahagsa ngadto sa 6-2 win-loss record, midominar sa first round gamit ang iyang gidak-on ug striking skills, apan naluwas si Torre human niya nadepensahan ang atake ni Esfra.

Si Torre nakaangkon og dakung gisi sa walang kilay gibukbok siya ni Esfra sa second round.

Apan human mabantayi nga nahutdan na og hangin si Esfra, si Torre daling nakahimo og ground reversal aron tuk-on kini niya ug wala dayon makabarog hinungdan nga gihunong ni referee Jonas Azarcon ang away.

Sa supporting bouts, gibalian ni Alde De Soza sa Bullet Muay Thai si Adamson Torbiso sa 2:40 sa first round, samtang si Johnjier ‘Dangerous’ Torbiso namawi sa kapildihan sa iyang uyoan pinaagi sa pagkulata ni Danny Diaz Jr. sa first round.

Sa undercards, ang kanhi Muay Thai champion nga si Gino Po mi-submit ni Rannie Calunsag, si Rambo Galleto mipaundang ni Miguel Omboy, samtang si Leo Rodrigo midaog pinaagi sa majority decision batok ni Xander Ymbong.

Si Pablo Santillan mipatigbabaw batok ni Victor Lago, si Martin Lauron mikulata ni Bronzon Diaz, samtang si Axel Torbiso midaog pinaagi sa unanimous decision batok ni Benjie Capisnon.  (BANAT SPORTS)