CEBU, Philippines - Ang tandem nilang Danika Yolanda Gendrauli ug Princess Anne Pido nga midala sa ngan sa Southwestern University (SWU), maoy mangu sa mga partisipante sa women's teams nga mag-ilog sa dungog sa Visayas eliminations sa 15th Nestea Beach Volley nga gikatakda karong Marso 9-11 didto sa HK Beach Resort sa lungsod sa Moalboal.
Sila si Gendrauli ug Pido, ang reigning CESAFI beach volley champion, gituohang maka-engkuwentro og lig-on nga kontra sama nilang Juvi Carmelle Vinson ug Genevieve dela Cruz sa University of St. Agustin (USA)-Iloilo, Sarah Jane Tanilon ug Catherin Mortula sa Foundation University (FU)-Dumaguete, Ruby Casipe ug Jennifer Cosas sa University of Negros Oriental-Recoletos (UNO-R) ug kaubang Sugbuanon nga sila si Kaisee Delos Santos ug Beatriz Gomez sa University of San Jose-Recoletos (USJ-R).
Sa laing bahin, sila si Jade Becaldo ug Mike Abria sa University of the Visayas (UV) mao sab ang title contenders sa men's bracket.
Ang University of San Carlos (USC) moparada nilang Kennith Bensig ug Bon Vincent Estrera, samtang ang USJ-R mokuha sa serbisyo nilang Jade IIliut ug Jason Uy.
Ang mga entrante gikan sa gawas sa Sugbu naglakip nilang Glen Ventolero ug John Michael Acain sa FU, Jason James Palma ug Izrah Hernando sa USA-Iloilo ug sila si Mark Hojilla ug Markheen Bendecio sa NegOr-Bacolod.
Ang University of Southern Philippines Foundation, University of St. La Salle-Bacolod, Central Philippines University, Colegio de la Purisima Concepcion-Iloilo, Cebu Doctors’ University ug ang University of Cebu (UC) gitakda sab nga mopakita'g aksiyon, apan wala pa mipadala sa ilang tagsa-tagsang lineups.
Ang top three finishers sa Visayas leg makakuha og pasaporte alang sa National Finals sa Abril 19-21 didto sa Crystal Sand sa Boracay Island. (BANAT NEWS)