CEBU, Philippines - Mohatag ang Philippine Sports Commission (PSC) og P65,000 monthly financial assistance ngadto sa Cebu City Sports Commission (CCSC) agi'g pagsuporta sa ilang grassroots development program.
"The amount may just be minimal but at least it would somehow help the program [of CCSC] especially to the volunteers who gave their services to the kids for free," matud pa ni PSC chairman Ritchie Garcia.
Pinaagi sa spirit of volunteerism nga gipasiugdahan sa CCSC pinaagi sa ilang tsirman Edward Hayco, ang Cebu City nakahimo na og Guinness record alang sa "World Biggest Dance Class' nga adunay 8,000 ka partisipante tulo na ka tuig ang nakalabay.
Agi'g pagdason sa maong kalampusan, ang CCSC nakadani og 43,000 ka entrante sa ilang pagsuway sa pagbuak og laing Guinness rekord alang sa "World's Largest Chess Tournament" sa miaging bulan.
Sa iyang pagbisita sa usa ka mga eskuylahan dinhi sa Sugbu, nakita ni Garcia ang dakung impact sa grassroots program sa CCSC ilabi na sa mga kabatan-onan.
Sa iyang bahin, si Hayco miingon nga gibati nila ang dakung kalipay nga ang ilang mga paningkamot giila sa PSC.