Simpolykes makigsangka batok sa Chariz & Caleigh karon

CEBU, Philippines - Magtakos karong gabii ang kanhi kampiyon sa F. Llamas Youth Association (FYA) nga Simpolykes ni playing coach Noel Medalle batok sa Chariz & Caleigh atol sa nagpadayong torneyo sa bag-o lang gisugdan nga fourth season kaniadtong Miyerkoles didto sa barangay Tisa covered court ning dakbayan.

Duha na lang sa unom ka teams ang wala pa makapakita'g aksiyon tungod kay humana moduwa ang upat ka teams niadtong opening day.

Midaug dayon ang Steven Jocavbz batok sa Leo Lauron, 93-75 ug naka-ispot sab ang Grand & Jae batok sa CMK Trading.

Mas gihigpitan karong tuiga ang lagda sa FYA ug ang kanunay mo-absent sa practice adunay silot nga ipahamatang aron sila ma-leksiyon.

Ang format sa maong torneyo mao ang single round robin ug ang top four maoy mo-abante sa semifnals ug ang laing duha ka teams nga makakiha og ubos nga records maoy matagak.

Ang no. 1 makigsangka batok no. 4 ug ang no.2 makigtakos batok sa no 3. ug ang mga mananaug maoy mag-abot sa finals ug ang mga pildero maoy mag-ilog sa ikatulong pwesto.  - BANAT NEWS