CEBU, Philippines - Dili lang usa, kun dili duha na ka tanyag ang nadawat ni ALA boxing prospect AJ 'Bazooka' Banal aron moaway og world title karong tuiga.
Human mihayag ang iyang kahigayonan nga moaway sa world title human siya nahimong No.1 bantamweight contender sa World Boxing Organization (WBO), si Banal nakakuha usab og offer aron moaway alang sa bakanteng International Boxing Federation (IBF) title.
Kun dawaton ni Banal ang tanyag sa IBF, sangkaon niya ang South African mandatory challenger nga si Vusi Malinga.
Si ALA Promotions CEO Michael Aldeguer, nagkanayon nga gitimbang-timbang karon nila kun asa sa duha ka offer ang ilang dawaton alang ni Banal.
Hinuon, si Aldeguer namahayag nga ilang hatagan og mas dakung gibug-aton ang WBO title ilabi na karon nga posible kining mabakante kun modayon si reigning Mexican champion Jorge Arce pagsaka sa super bantamweight division. (BANAT SPORTS)