Donaire milampos bag-ong Four-Division World Champion

CEBU, Philippines - Gipakita ni Nonito ‘The Filipino Flash’ Donaire nga siya na ang sunod nga boxing icon sa nasud.

Bisan pa sa nabuak niyang tuong kamot, mipatigbabaw gihapon si Donaire aron makuha ang bakanteng WBO super bantamweight title.

Mimugna og gamay nga kontrobersya ang desisyon sa usa ka judge nga si Ruben Garcia kinsa mihatag og 115-112 pabor ngadto ni Vasquez bisan pa og tataw kaayo nga gidominaran ni Donaire ang away.

Ang duha sa mga hurado nga sila si Levi Martinez ug Don Trella pulos mihatag og 117-110 ngadto ni Donaire.

Sa sayu palang sa away, gipakita dayun ni Donaire ang iyang labaw sa gipaspason ug reach dihang iyang gibombahan og mga hait nga uppercuts ug hooks si Vasquez kinsa naglisud pagdiskarte batok sa Pinoy boxing icon.

Misugod og init ang sinukliay sa tunga-tungang bahin sa away human misulod si Vasquez kinsa mipasud usab sa iyang kumo, apan wala usab magpaalkanse ang Fil-American tungod kay mibuhi usab kini og mga hait nga counter-attacks.

Miabot ang knockdown sa 9th round human mipatugpa og hait nga two-punch combo si Donaire ngadto ni Vasquez kinsa nahayang apan dali ra usab nga nakabarug.

“When I knocked him down in the ninth round, that was the end of the hand. I was in agony,” matud pa ni Donaire.

Ang maong panghitabo mipasamot sa kompiyansa ni Donaire ug nagpabilin niya ang momentum hangtud nga mibagting ang kampanilya sa round 12 timaan sa pagtapos sa away.

“He’s real quick. He caught me with some good punches,” matud pa ni Vasquez. “He is a great fighter.”  - BANAT NEWS