Junville Car Access, Susing Guitar nidaog

CEBU, Philippines - Gisugat dayon og daog ang Junville Car Access ug ang Susing Guitar dihang ilang gipanglubong ang tagsa-tagsa nilang kaatbang sa pagsugod sa Abuno Basketball Association (ABA) cagefest niadtong Domingo didto sa ilang open court sa Brgy. Pajac, Lapu-Lapu City.

Gihimulbolan sa Junville Car Access ang Virlo Co., 52-40, samtang gipanamastamasan sa Susing Guitar ang Cedrixs aron moiskor og 71-44 nga kadaugan.

Ang Junville Car Access ni team owner Junville Villapez gilubong og katunga paghuman sa first period, 7-14, apan wala kini makapaluya kanila, hinuon nadasig kini sa pakigbisog sa pagpangulo nilang Allan Sepe ug Centes Brañanola.

Nakarekober ang Junville sa second period diin mipabuto kini og 17 puntos batok sa nakuha sa Virlo Co. nga otso puntos aron mailog ang pabor sa halftime, 24-22.

Sa second half, wala na magpatugaw ang Junville, kinsa nagpatuyang lang og pamupo'g mga puntos hangtod nga nahurot ang oras sa ilang duwa.

Si Sepe mihabwa og 19 puntos, samtang sila si Sepe ug Aparri miugkat og 11 puntos matag usa alang sa ilang 1-0 nga baraha.

Sa laing duwa, ang A&T Transco mikulit sab sa ilang unang daog, 76-65 batok sa Voyager, ang Rhea Dental Clinic miibot sab sa una nilang daog batok sa Chrison sa iskor nga 64-59.

PUNTOS MATAG USA

Unang duwa:

JUNVILLE CAR ACCESS (52) - Sepe 19, Brañanola 11, Aparri 11, Amit 7, Igot 4

VIRLO CO. (40) - Cortes 19, Rosarase 12, Gasco 4, Kort 3, Lozano 2, Baguio 2

Ikaduhang duwa:

SUSING GUITAR (71) - Taghoy 16, Baring 15, Taghoy 15, Valiente 8, Borlaos 8, Igot 4, Povadora 3, Inot 2

CEDRIXS (44) - Ingos 12, Alegre 11, Torado 7, Guimary 4, Igot 4, Obrador 4, Montague 2  (BANAT SPORTS)