Nagkahayag World title fight ni Banal

CEBU, Philippines - Nagkadaku ang posibilidad nga makuha na ni ALA bantamweight prospect AJ 'Bazooka' Banal ang gidamgo niyang world title shot karong tuiga.

Ang 23-anyos nga si Banal (26-1, 19KOs) maoy ranked No. 1 sa World Boxing Organization (WBO) nga maoy mipadaku sa iyang kahigayonan nga makuha ang labing una niyang world title fight.

Si ALA Promotions president Michael Aldeguer nagkanayon nga nagpaabot pa sila sa desisyon sa WBO, apan gipasalig niya nga anaa ra sa kilid-kilid ang title fight alang ni Banal.

Si Banal susama na karon og estado sa iyang stablemate ug undefeated flyweight Milan Melindo kinsa No. 1 ranked usab sa WBO ug hapit na kining moaway alang sa titulo.

"This is history for us having Milan and AJ both ranked No. 1 in the WBO," matud pa ni Aldeguer. "Nay possibility nga basin og mag-una pa si AJ og away for the world title kaysa ni Milan."

Ang WBO title kasamtangang gihuptan ni Mexican Jorge Arce nga modepensa sa iyang bakus batok ni Lorenzo Parra karong Pebrero 18.

Gibutyag ni Aldeguer nga si Banal moaway karong Marso 24 dinhi sa Sugbu batok sa wala pa hinganling kontra, apan giisip kini nga dugang preparasyon alang sa ALA fighter alang sa iyang world championship fight.

"Ako ready na gyud kay ko, gusto na gyud ko ma-world champion and if moabot na ang chance akong buhaton tanan kay mao na akong damgo," matud ni Banal. "Salig sad ko nga tulo na unya mi nila ni Donnie (Nietes) ug Milan nga ma-world champion."

Plano usab ni Aldeguer nga ipadala si Banal ngadto sa Estados Unidos uban ni Melindo   aron mag-ensayo ubos sa giya ni topnotch trainer Roberto Garcia, ang trainer ni two-division world champion Nonito Donaire Jr.    (BANAT SPORTS)