Haojue Motorcycle wa pay pilde

CEBU, Philippines - Nagpabiling walay pilde ang Haojue Motorcycle human miarangkada batok sa RGMA-Kapuso, 105-92 sa Mabolo Community Basketball Association (MCBA) and Media Basketball Tournament sa miaging adlaw didto sa Mabolo Sports Complex.

Nagbinayloay og mga puntos ang duha ka koponan, apan ang Kapuso maoy nakabentaha paghuman sa halftime, 53-45 luyo sa mga paningkamot nilang Lloyd Suarez ug Gabriel Bonjoc.

Sa final period, misikit pag-usab ang iskor, apan ning higayona, ang Haojue na usab ang nakapabor human sa sunod-sunod nga triples ni Mckoy Sarvida, 97-91 sa katapusang dos minutos sa duwa.

Gikan didto wala na buhii pa sa Haojue ang labaw dayon na pagsakmit sa daog.

Nangulo sa Haojue mao si UV Lancers assistant coach Tong Abelarde sa iyang 18 puntos.

Sa sayo pa, ang Aksyon Bisaya (TV5) midaog batok sa MCBA Team, 85-83.

Si Rodel Quimod maoy leading scorer sa TV5 sa iyang 16 puntos, samtang si Eldon Temperatura nga miburak og 26 puntos maoy nangu sa MCBA. - (BANAT NEWS)