CEBU, Philippines - Gisuklian og kadaugan ang mga paningkamot sa Team Mandaue City ug Team Cebu City sa PLDT-ABAP Visayas Amateur Boxing tournament sa miaging adlaw didto sa Robinson’s Mall sa Dumaguete City.
Bisan pa og napalagpot sila sa ilang trono isip overall champion, ang Team Mandaue nakahimo gihapon sa paghari sa youth division, samtang ang Team Cebu maoy kampiyon sa junior division.
Ang Mandaue misakmit og duha ka golds, usa ka silvers ug tulo ka bronzes sa youth division kortesiya nilang Kevin Jake Catajara ug Rolan Servania, samtang si Mardy Muaña misakiyo sa silver medal.
Sila si Polid Banal, Bryan Remedio ug Eleno Traya midaog og bronze medals.
Sa laing bahin, ang Team Cebu nga nanghawod sa junior class mikolekta og tulo ka gold ug duha ka bronze medals.
Mikabkab og bulawan alang sa Team Cebu City mao sila si Junrel Jimenez, Jerry Castroverde ug Jay-jay Antipala.
Sila si Rodex Piala ug Steven Noblefranca maoy mihatud og duha ka bronze medal sa Team Cebu.
Ang tanang gold medalists sa matag kategoriya moabante sa National finals nga gitakda sa Marso didto sa Tagbilaran City. - (BANAT NEWS)