Casimero mosakmit sa world title - Gello-ani
CEBU, Philippines - Daku ang pagsalig ni SGG Sports Promotions president Sammy Gello-ani nga madaog sa iyang batos nga si Johnriel 'Quadro Alas' Casimero ang world title atol sa sangka niini batok ni Luis Alberto Lazarte sa Pebrero 10 didto sa Buenos Aires, Argentina.
Ang kanhi WBO interim light flyweight champion nga si Casimero ug ang veteran Argentinian nga si Lazarte mag-ilog sa bakanteng IBF light flyweight championship.
Nagkanayon si Gello-ani nga si Casimero moaway sa world title dihang ang IBF mipahibalo nga bakante ang bakus human mapakyas ang Mehikanong si Ulises Solis sa pagdepensa tungod sa injury.
Si Solis kinahanglan nga mopahuway sa boksing aron magpaalim sa iyang nabuak nga apapangig dihang nakigsukmagay ni WBC light middleweight champion Saul Alvarez sa usa ka bar didto sa Mexico sa miaging tuig.
Ikaduha kining pagsuway ni Casimero paglangkat sa world title human sa sakit niyang kapildihan ngadto ni IBF flyweight king Moruti Mthalane pinaagi sa fifth round TKO niadtong miaging Marso didto sa South Africa.
"In his fight with Mthalane, kulang gyud ang bata sa preparation, pero karon straight iyang training ug akong nakita nga nindot ang iyang kondisyon, salig gyud ko 80% makuha na ni Johnriel ang world title," matud pa ni Gello-ani.
Si Casimero todo-ensayo diha sa Omega Boxing Gym ug nakahuman na usab siya og kapin 100 ka sparring rounds lakip na ang iyang sparring session batok ni undefeated ALA Gym star Milan Melindo.
Si Casimero adunay 15-2, 9KOs record, samtang ang 40-anyos nga si Lazarte nagtangag og record nga 40-10, 18KOs. (BANAT SPORTS)
- Latest
- Trending
