5-0 sweep sa Adamson

MANILA, Philippines - Nakitaan ng matibay na laro si pitcher Rizza Bernardino sa magkabilang dulo ng plates at ang nagdedepensang Adamson Lady Falcons ay namayani sa University of the East, 3-0, at makumpleto ang 5-0 sweep sa pagtatapos ng 74th UAAP softball first round action kahapon sa Rizal Memorial Field.

Pinawi ni Bernardino ang pagkakaroon ng apat na hits sa 5 at 1/3 innings na pagpukol nang walang Lady Warriors na nakaabante hanggang second base.

Ang 18-anyos rookie na inaasahang mapapasok na rin sa national team ay nakitaan din ng ba­ngis sa hitting nang ipasok nito ang dalawang runs sa third inning na nagselyo sa panalo.

Isang standing double ang kinuha ni Bernardino kay UE pitcher Jan Aribal upang linisin ang mga nasa bases na sina Elma Parohinog at Queeny Sabobo.

Si Parahinog ay tu­mung­tong sa isang fielder’s choice habng si Sabobo ay nakatungtong ng base sa isang hit.

Sa 5-0 karta ng Lady Falcons, kailangan na la­mang nilang maduplika ang ipinakitang laro sa se­cond round upang mapagtagumpayan na mapanati­ling sa paaralan ang titulo.

Ang kabiguan ng Lady Warriors ay nagresulta para bumagsak sila sa 3-2 karta para sa ikatlong puwesto.

Inangkin ng UP ang solo-ikalawang puwesto sa 4-1 karta sa pamamagitan ng 4-0 shutout panalo sa La Salle na nalaglag sa 0-5 baraha.

May 2-5 karta ang runner-up noong nakaraang season na UST matapos ang 8-3 panalo sa Ateneo na may 1-4 baraha.