Pason mikulit og kasaysayan

CEBU, Philippines - Wala siya mag-agi og pormal nga ensayo sa chess sa linghod niyang pangedaron, apan ang batan-ong si Allan Pason sa Lapu-Lapu City mikulit sa iyang pangan isip labing unang kampiyon sa Cebu Chess Festival niadtong weekend didto sa Cebu City Sports Center (CCSC).

Apan ang sentro sa maong makasaysayanong kalihukan mao ang gipangandoy sa Sugbu nga Guinness record alang sa "World's Largest Chess Tournament" sa board game category.

Sa kasamtangan, ang Russia maoy naghupot sa rekord dihang 1,214 ka partisipante ang niapil sa kalihukan nga gipasiugdahan ni Eugenie Kuznitsov niadtong June 2, 2007 didto sa Central City Park sa Krasnoyarsk.

Nakat-on si Pason sa duwang ahedres pinaagi lang sa pagtan-aw og duwa sa iyang mga silingan dihang nag-edad pa siya og singko anyos.

Ang second year student sa Pajo National High School (PNHS) mipukan ni Christian Pondoyo sa University of Cebu (UC) gamit ang Slav Defense opening atol sa ilang sangka sa final, ang ika-10 niyang duwa sa duha ka adlaw nga kompetisyon.

Ang 15-anyos nga si Pason nahimong two-time Shell Youth Active Chess national champion. Nangampanya sab siya sa ASEAN Chess Championships diin iyang gipilde ang top-seed player gikan sa Vietnam.  (BANAT SPORTS)