Pacquiao wad-an og paglaum

CEBU, Philippines - Hinay-hinay na nga nawad-an og paglaum si WBO welterweight champion Manny Pacquiao nga mahinayon pa ang ilang “super-fight” ni undefeated Floyd Mayweather Jr. karong tuiga.

Si Pacquiao nahugno human madunggi ang tubag ni Mayweather kinsa mibasura sa iyang tanyag nga 50-50 nga bahinay sa kita aron mahitabo na ang ilang away.

Ang Amerikanong boksidor namahayag niadtong Biyernes nga dili siya musugot nga susama ra sila og kantidad nga dawaton sa Pinoy boxing superstar ug angay nga siya maoy modikta sa detalye sa ilang away.

 Tungod niini daw nahubsan na sa paglaum si Pacquiao kinsa andam na karon nga makigsangka og laing boksidor gawas ni Mayweather.

"Okay lang. May iba pa namang fights," matud pa ni Pacquiao sa The Philippine Star.

Sa iyang bahin, ang promoter ni Pacquiao nga si Top Rank Inc. bigboss Bob Arum nangusog nga imposible nga mapugos sila pagpaubos ngadto ni Mayweather ug tugutan kini nga mudawat og mas daku nga salapi kaysa ni Pacquiao.

"This is not the normal way you put together a big fight. The normal way would be for us to sit down somewhere. Mayweather said he won’t agree to a 50-50 split with Manny. Now that's something blocking the fight, something we won’t agree to," matud pa niya.

Sa laing bahin, wala pa gikompirmar sa kampo ni Puerto Rican champion Miguel Cotto kun gidawat naba nila ang tanyag nga makigsangka pag-usab ni Pacquiao sa Hunyo 9.  - BANAT NEWS