Bonggang pasundayag sa Cebu's Guinness bid

CEBU, Philippines - Usa ka bongga ug mabulokong pasundayag ang nasaksihan sa lawod sa katawhan atol sa katapusang hugna sa makasaysayanong pagsuway sa Cebu pagbuak sa Guinness record alang sa "World's Largest Chess Tournament" sa board game category kagahapon didto sa Cebu City Sports Center (CCSC).

 Talagsaong ceremonial opening move nga nakapaukyab sa nanambong dihang ang mga sakop sa Dancesport-Team Cebu City mipasundayag og talagsaong production number diin sila misayaw og unique chess movements uban ang 32 dancers nga mipresentar sa chess pieces sa higanteng chess board. 

Tres mil ka chess players ang gikatag sa CCSC grandstand ug niduwa sa tuyo nga matuman sa Cebu City Sports Commission (CCSC) ang pagbuak sa rekord nga gihuptan karon sa Russia dihang 1,214 ka mga partisipante ang nisalmot sa maong kalihukan nga gipasiugdahan ni Eugenie Kuznitsov niadtong Hunyo 2, 2007 didto sa Central City Park sa Krasnoyarsk.

Bisan walay representante gikan sa Guinness ang nitambong atol sa kalihukan, si CCSC chairman Edward Hayco miingon nga estrikto nilang gimonitor ang tanang duwa ug pagseguro nga hapsay ang pagdokumento aron ang ilang paningkamot dili mahimong walay bili ug walay hinungdan.

Sa iyang bahin, si chess patron and sports commissioner Boogie Lim nahimuot sa dihang iyang nakita ang mga gagmay'ng bata nagpunsisok ug kabahin sa halandumon nga kalihukan.

Ang 5-anyos nga si Harvey Durano Jr. sa Lapu-Lapu City mao ang kinabataang player, kinsa nitigi sa opening matches kagahapon.

Tulo ka rounds ang gitigian kagahapon, samtang ang nahabiling upat duwaon karong adlawa. Human sa duwa,   koronahan dayon ang grand champion.  (BANAT SPORTS)