UE mitagak sa UV
CEBU, Philippines - Mitusak og kuwatro puntos si Roy Sumang sa katapusang 22 segundos sa duwa aron tabangan ang University of the East (UE) Red Warriors pagtagak sa University of the Visayas (UV) Green Lancers, 79-76 sa M. Lhuillier Kwarta Padala Sinulog Cup basketball tournament kagahapon didto sa Cebu Coliseum.
Human sa 20-all nga panagtabla paghuman sa first period, sikit na kaayo ang duwa sa duha ka kampo ug walay usa kanila ang milabaw og kapin sa sayes puntos.
Katapusang nagtabla sa iskor nga 75-all sa split charities ni Wowie Escosio nga nakapalabaw sa UV sa katapusang higayon, 76-75 sa nahabiling 41 segundos sa duwa.
Nakabangon ang UE dihang giluwas kini ni Sumang pinaagi sa iyang drive gikan sa right wing aron hatagan ang Red Warriors og uno punto nga labaw, 77-76 sa katapusang 22 segundos sa final period.
Mahatod unta sa UV ang duwa ngadto sa overtime, apan wala kini makahimo og maayong opensiba human ang pasa ni John Abad nailog ni Sumang, kinsa daling gi-foul ni Cris Perolino sa tuyo nga maurong ang oras.
Kalma kaayong mipasud si Sumang sa iyang free throws sa nahabiling nuybe segundos sa dili pa mapupos ang oras.
Si Sumang miiskor og nuybe puntos, apan si Moustapha Arafat maoy nangu sa UE pinaagi sa iyang 15 puntos. Si Abad maoy nangu sa pilderong UV sa iyang 19 puntos. (BANAT SPORTS)
- Latest
- Trending
