Sonsona sa US na mag-train

CEBU, Philippines - Ang kanhi WBO super flyweight champion nga si 'Marvelous' Marvin Sonsona mohimo sa sunod niyang lakang aron mabalik ang iyang ngalan isip usa sa mga ngilngig nga boksidor sa nasud.

Si Sonsona gitakdang ipadala sa iyang manager ug international boxing promoter Sammy Gello-ani ngadto sa Estados Unidos aron didto mag-ensayo.

Sa dili pa molarga, ang 21-anyos nga si Sonsona moaway pa sa katapusang higayon dinhi sa nasud batok ni Carlos 'El Flaco' Fulgencio sa Dominican Republic sa Pebrero 25 didto sa Hoops Dome sa Lapu-Lapu City.

Si Sonsona adunay record nga 15-1, 12KOs, samtang si Fulgencio nagtangag og 19-5, 15KOs.

Si Sonsona milampos sa iyang "comeback fight" niadtong Oktubre sa miaging tuig batok ni Mexican Carlos Jacobo nga iyang gipilde pinaagi sa "unanimous decision." (BANAT SPORTS)