CEBU, Philippines - Masaligon si Private Schools Athletic Association (PRISAA) National Chairman Emmanuel Angeles nga ang Cebu molampos pag-host sa 20th PRISAA National Collegiate Games nga gikatakda karong Abril 22-28.
Si Angeles, uban sa iyang co-chairman ug PRISAA National President Fr. Vicente L. Uy, SVD, maoy nangulo sa tinuig nga national board meeting sa miaging adlaw didto sa Narra Room sa Cebu Country Club.
Gituki sa maong tigum mao ang pagpangandam sa umaabot nga kalihukan lakip na ang billeting, accommodation ug playing venues.
Mihimo sab sila og back-up plan enkaso ang track oval sa Cebu City Sports Center dili magamit sa gitakdang iskedyul.
Ang athletics ug batted sports adto duwaon sa Danao City.
Sa iyang bahin, si Fr. Uy miingon nga iyang lauman nga ang kagamhanan sa siyudad sa Sugbu mohimo og paagi aron ang pagbag-o sa track oval mahuman na sa dili pa ang national PRISAA.
Sumala pa ni Fr. Uy nga adunay kapin sa 5 mil ka athletes ug coaches ang moanhi sa Sugbu. Tungod niini nangayo siya'g tabang ug suporta gikan sa local officials, sa Department of Education (DepEd) ug private schools alang sa kalampusan sa prestihiyosong national multi-sporting event.
Isip host, ang Central Visayas mao paborito nga makadepensa sa overall championship nga ilang nalangkat sa miaging tuig didto sa Zamboanga City.
(Gikan sa TF) (BANAT SPORTS)