Duha ka Cebuano refs mo-officiate sa NSBC

CEBU, Philippines - Duha ka Sugbuanong referees ang giimbitar ni Basketball Association of the Philippines (BAP) secretary-general Graham C. Lim aron mo-officiate sa umaabot nga 64th National Students Basketball Championships (NSBC) gikan sa Pebrero 25 hangtod Marso 3 didto sa Dagupan City Sports Complex sa maong siyudad.

Si Lim, kinsa mibisita dinhi sa Sugbu sa miaging adlaw mipahibalo sab nga ang international referee nga si Jose 'Boy' Murillo iyang gikuha isip technical officer sa maong liga. Si Murillo mao sab ang regional commissioner of the BAP Referees Commission (BAPRECOM).

Ang duha ka Sugbuanong referees nga mo-officiate didto sa Dagupan mao sila si Alejandro Briso ug Judy Olasiman.

Si Lim nakigkita sab nilang Cebu Schools Athletic Foundation, Inc. (CESAFI) commissioner Felix O. Tiukinhoy, Jr. ug University of Cebu (UC) Webmasters team manager Atty. Baldomero C. Estenzo aron pag-pinalisar sa pagsalmot sa koponan sa NSBC.

Ang Webmasters nakakuha og luna alang sa NSBC ug morepresentar sa Sugbu isip collegiate champion sa CESAFI, samtang ang University of the Visayas (UV) Baby Lancers mao sab ang nakakuha og luna isip juniors division champion.

Isip host city, ang Dagupan gitugotan nga mopadala og duha ka teams sa seniors ug juniors division.

Dose ka teams ang mosalmot sa collegiate division ug unom sa secondary division.

Ang ubang mosalmot nga teams naggikan sa Davao City, Zamboanga City ug sa CARAGA Region. Ang NCR eliminations pagahimuon sa katapusang semana ning bulana.

Ang collegiate champion sa NSBC maoy ipadala ngadto sa 9th Asian University Basketball Championships (AUBC) didto sa Kuala Lumpur, Malaysia karong Hunyo.   - BANAT NEWS