CEBU, Philippines - Gi-usban na sab sa Indiana Pacers pagpukan ang Boston--usa sa korte sa Celtics ug usa didto mismo sa balwarte sa Pacers.
Dili kini tungod kay maayo gyud kaayong nakaduwa ang Pacers apan tungod kini kay sobra sab kangil-ad ang duwa sa Celtics ug ang hinungdan sa ilang pagsukarap karon nga season mao ang ilang katiguwangon.
Walo ka adlaw human modaug didto sa Boston, midaug na sab ang Pacers kagahapon sa iskor, 97-83 didto sa Bankers Life Fieldhouse sa Indianapolis, Indiana. Ang unang daog mahimong usa ka buynas apan karon daghang nagtuo nga dili na kakumpyansaan ang Pacers.
“I think the message is that we’re a force to be reckoned with in the East,” matod pa sa Pacers forward nga si Danny Granger kinsa miposa og 21 puntos. Padayong batbat ni Granger “It’s not one of those fluke things where we just started having a good beginning of the season. We’re actually a legitimate contender in the East. We’re right there, and we should be recognized as that.”
Ang Indiana kinsa adunay 9-3 nga baraha, misalig sa ilang kaugalingon apan ang Boston kinsa maoy 2008 champion, napukan na sa upat ka sunod-sunod nga higayon.
Daan nang nabalaka si Boston coach Doc Rivers sa ilang pakigsangka batok sa Pacers didto sa Indiana ilabi na kay napilde sab sila sa ilang pagsulong didto sa Chicago kaniadtong Biyernes.
“Honestly, it’s a bad game going into. You knew it would be a tough one, with a back-to-back like that. We saw that when I saw the schedule,” matod pa ni Rivers.
Sa iyang bahin, ang coach sa Pacers nga si Frank Vogel nagkanayon “We’ve been stressing to push the tempo more than we did early in the season. We just push the tempo, push the tempo, wear them out and put someone fresh in. That’s how we want to play every night.”
Tataw karon nga dunay suliran ang Boston ug dili nila ikalimod nga ang pangedaron sa ilang players ilabi na ang Big Three nag-anam na katiguwang.
Bisan ang 25 anyos nga si Rajon Rondo mao na karo'y bag-ong sinaligan sa Celtics, ang uban nilang starters ilabi na ang Big Three nga sila si Kevin Garnett, Paul Pierce ug Ray Allen ingon man usab ni Jermaine O'Neal, pulos na tag-33 anyos.
"Goudelock sa World Peace"
Alang kanako, dili na bag-o kung adunay mga inilang atleta nga magpa-change of name ug usa niini mao si Ron Artest, ang numero 15 nga player sa Los Angeles Lakers nga karon giila na nga si Metta World Peace.
Dili kini madali-dali ang pagpa-change of name kay dili kini mahimo nga imo lang gusto nga isuwat diretso sa papel nga bisan og dili ka si James Bond 007, imo gyud isuwat nga ikaw si James Bond.
Mag-agi pa kini og publication ug modangop ka ngadto sa korte aron tugotan ka nga ma-usab ang imong ngalan ug sagad sa magpa-change of name, aduna gyu'y igong rason kung ngano ilang usbon ang ilang ngalan nga binunyagan sa ilang mga ginikanan.
Una nakong nadungog nga nagpa-change of name mao ang sikat kaayong boksidor nga si Cassius Clay. Siya mao si Muhammad Ali ug iyang gipa-usab ang iyang ngalan isip protesta aron dili siya ipadala sa usa ka gubat kay dili siya gustong mopatay og tawo.
Ikaduhang inila nga atleta nga akong nahibaw-an nga nagpa-change of name mao si Lew Alcindor sa karaang Los Angeles Lakers nga giila nga si Kareem Abdul-Jabbar, usa sa labing maayong player sa kasaysayan sa NBA nga sakop sa 50 Greatest Players.
Karong bag-o, si Artest nahimo nang Metta world Peace sa Lakers apan mao gihapon ang numero nga iyang gigamit. Lahi sab ang rason nganong nagpa-usab si Artest sa iyang ngalan ug kini tungod kay matod pa niya nga gusto siya'g kalinaw ug panaghiusa ilabi na sa mga batan-on sa tibuok kalibotan.
Abi ninyo mga higala, usa kini si Artest sa labing maldito nga player sa NBA ilabi na sa didto pa kini siya magduwa sa Indiana Pacers niadtong sayong bahin sa dekada 90.
Mas maldito pa kini siya kang Charles Barkley nga panggulat ray maayo ug mas maldito pa siya ni Dennis Rodman nga pagpalagot ra gyu'y tuyo. Dihay usa ka higayon dihang nagsangka ang Pacers batok sa New York Knicks didto sa Madison Square Garden, nagkagubot ang duwa ug usa sa nalambigit sa away mao si Artest ug natumba pa gani si assistant coach Jeff Van Gundy sa Knicks sa sigeng pugong-pugong aron masanta ang away.
Opisyal nga na-usab ang ngalan ni Ron Artest ngadto sa Metta World Peace dihang gitugotan kini sa usa ka huwes human sa hamubong paghusay didto sa Los Angeles Superior Court ug kini gitugotan bisan wala ang presensiya ni Artest ug maoy mitambong didto ang iyang abogado nga nakig-atubang kang Commissioner Matthew C. St. George.
Abi ninyo mga higala, nalangay ang pagpa-change of name ni Artest bale'g tulo ka semana tungod kay nasuta nga dihay mga parking tickets nga wala niya bayari. ingon niana katarung ug ka-estrikto ang balaud sa America ug dili sila mo-ila kung kinsa pa bisan pa'g NBA player ka.
Matod pa ni Artest (World Peace) nga "Changing my name was meant to inspire and bring youth together all around the world. After this short delay, my tickets have been paid and I'm glad that it is now official."
Ang otso anyos nga anak babaye ni Artest nga si Diamond naglaraw sab sa pag-usab sa iyang apelyido ngadto sa World Peace karon nga opisyal na sab nga na-usab ang ngan ug apelyido sa iyang amahan.
Usa sab tingali sa hinungdan nganong gusto magpa-change of name ang usa ka tawo tungod kay wala siya maka-uyon sa iyang ngalan o di ba hinoon apelyido. Daghan kaayong mga bugal-bugalon sa Pilipinas ilabi na dinhi sa Sugbo nga nag-ingon nga ang kaliwat diay kuno ni Pat Boone taga Catmon kay siya kuno mao si Patricio Bucog ug si James Coburn sab taga Naga ug nausab kini gikan sa Jaime Caburnay.
Makahimuot kining Lakers karon kay duna sab sila'y player nga si Andrew Goudelock ug ambot siya ba kahay magdala'g swerte sa Lakers nga lahi man kini og spelling.
Igo lang akong maka-ingon ngadto sa Lakers "Goudelock sa World Peace."
PIT SENYOR! Happy Sinulog. (BANAT NEWS)