CEBU, Philippines - Nadugangan ang inspirasyon ni ALA boxing prospect Milan ‘El Metodico’ Melindo nga mopakita og nindot nga away karong Enero 28 human sa taho nga interesado nga mukuha niya ang numero unong boxing promotion sa kalibutan nga Top Rank Inc.
Sa taho sa examiner.com, ang 23-anyos nga si Melindo giisip karon sa Top Rank isip usa sa mga ngilngig nga Filipino fighter ug gitun-an nila ang proseso sa pagkuha niini isip bag-o nilang boksidor.
Si Top Rank Inc. bigboss Bob Arum ug ALA Promotions president Michael Aldeguer nakahigayun pagpakita sa miaging semana diin usa sa ilang nahisgutan mao ang nagsaka nga karera ni Melindo sa boxing.
Ang garbo sa Cagayan De Oro moaway karong Enero 28 batok ni Mexican Juan Esquer didto sa Waterfront Cebu City Hotel and Casino sa main event sa Pinoy Pride XI.
“Arum expressed his interest in the highly talented and promising Melindo, who is on the brink of a title shot,” matud pa ni Dennis Guillermo sa examiner.com.
Kun mahinayon kini, si Melindo mao ang mahimong ikatulong ALA fighter nga mopirma og kontrata sa Top Rank Inc. human nila ni Z Gorres ug Mark Melligen. (BANAT NEWS)