Pit Senyor!

Pit Senyor! Sinulog o Sinug, basta karong adlawa sadya sa tibuok Sugbu agi'g pagtimaan sa kapistahan sa Balaang Bata,   Senyor Santo Niño.

* * *

Nakatan-aw kita sa Colt 45 URCC -7 Dominate didto sa Cebu International Convention Center (CICC) sa dakbayan sa Mandaue niadtong Biyernes sa gabii.

Mibilib ako sa atong local fighters sama nila ni Cary 'The Prince' Bullos sa Self-Def kinsa mao na karon ang URCC Visayas bantamweight champion human niya mailog ang bakus pinaagi sa guillotine choke kang Rex 'T-Rex' De Lara sa Team Tagbilaran Warriors sa ikaduhang round.

Makadaghang higayon na akong nakatan-aw kang Bullos ug usa sa akong nabantayan ang kakulang niya og hangin. Atol sa away nila ni De Lara sa akong tan-aw gihangak na siya pero tungod sa sayop nga pag-atake ni T Rex kang Bullos na syakoy gyud iyang liog. Congrats sa duha ka fighters kay usa kadto sa giabibahang bout.

Si T Rex dihang akong gika-estorya sa ringside human sa away nakaingon ko nga mapahiubsanon siyang tawo.

Giangkon niya nga nasayop gyud siya sa iyang pag-atake. Mao nay tinuod nga martial artist.

Bilib sab ko sa kabangis sa taga Benguet nga si Eduard 'Landslide' Folayang dihang iyang gipasurender ang Brazilian nga si Wadson 'Knockout' Texteira sa unang round pa lang. Wala hinuon kaayo makapakita og labok si Texteira kay na-dominate dayon ni Folayang ang tempo sa away hangtod nga nalutsan kini sa nawong ug nakaluhod ug diha-diha gilumsan og kinumo sa Pinoy.

* * *

Karon nanghagit na gyud si Floyd Mayweather Jr. kang Manny Pacquiao alang sa mega fight karong tuiga. Hinuon dili kini mahitabo karong bulan sa Mayo nga maoy giingong gipangayo ni Mayweather.

Mas gusto ni Pacquiao nga sa bulan na sa Hunyo. Unta dili na kini himuong rason ni Mayweather aron dili na lang sab mohinayon.

Maayo karon nga mismong si Pacquiao ug Mayweather na ang parehong nanghagit aron matuldokan na si kinsa gyud nila ang pound for pound king sa kauwahian. Hinumdumi nga kun nindot ang away sa duha posibleng aduna pa kini rematch.

* * *

PASALAMAT: Nagpasalamat ang mga kadagkoan sa Grand Sioux Alumni Council sa Alpha Sigma Omega International Service Fraternity and Sorority nga mga mitambong sa labing una ug malampusong GSAC First National Convention nga gihimo sa Ecotech kagahapon didto sa barangay Lahug Cebu City.

Ilabi na sa mga representante sa mga nagkadaiyang chapters sa nasud.

* * *

GREETINGS: Belated happy birthday to my mother Adelaida Melecio sa iyang adlaw’ng natawhan kagahapon. Happy birthday usab sa inahan ni Bro. Ryan sa Tacloban nga magsaulog sa iyang birthday karong adlawa.

* * *

PAGTULON-AN: Makakaplag ka lamang kung ikaw molihok.