Folayang mipaundang ni Texteira
CEBU, Philippines - Gipakita ni Eduard 'Landslide' Folayang sa Team Lakay Wushu ngadto sa mga Cebuano fans og nganong siya ang giisip nga numero unong Mixed Martial Arts (MMA) fighter sa nasud dihang iyang gipaundang si Brazilian Muay Thai specialist Wadson 'Knockout' Texteira sa Colt 45 Universal Reality Combat Championship (URCC) Cebu 7: Dominate sa miaging gabii didto sa Cebu International Convention Center (CICC).
Nanginahanglan lang og 56 segundos si Folayang dihang iyang gipahamtangan og bangis nga ground-and-pound si Textiera nga nagsalimoang og panagang hangtod nga napugos pag-"tap" timaan sa iyang pag-undang.
Ang Thailand-based Brazilian nga Texteira nakahimo pagpatumba ni Folayang gamit ang kalit nga left jab ug gisuwayan usab niya pagtuok ang Filipino fighter pinaagi sa usa ka "guillotine choke," apan daling nakapanalipod si Folayang.
Mipatigbabaw ang kusug ni Folayang dihang nadat-ogan niya ang Brazilian uban sa pagbuhi niya sa nagpungasi nga mga kinumo nga maoy nakapaaghat ni Textiera pagsurender.
Sa supporting bout, ang Cebuano nga si Cary 'The Prince' Bullos milampos paglangkat sa URCC Visayas bantamweight title ni Rex 'T-Rex' De Lara sud lang sa 40 segundos sa second round.
Sa laing title match, nadepensaan ni Victor 'Gladiator' Torre sa DEFTAC Bacolod ang iyang URCC Visayas pinweight title human niya gipilde si Geronio 'El Matador' Etac sa Yaw-Yan ArDigma pinaagi sa arm bar submission sa oras nga 6:17 sa first round.
Sa undercard, si Jonathan Sumogat midaog pinaagi sa submission batok ni Renan Noblefranca, si Jimmy Yabo mipaundang ni Urtych Alarin, samtang si Roel 'Akiyama' Rosauro mi-KO ni Arnel Ylanan.
Gikulata ni Vaugh 'Spawn' Donaire si Hans Christian Lamanilao ug si Alde De Soza mi-TKO ni Samuel Estandarti. (BANAT SPORTS)
- Latest
- Trending
