CEBU, Philippines - Gipahugtan sa Miami Heat ang liderato sa Eastern Conference human ilang gilampurnas ang New Jersey Nets didto sa balwarte sa ilang kaatbang pinaagi sa pag-iskor og 101-90 nga kadaugan kagahapon sa nagpadayong NBA regular season didto sa Prudential Center sa Newark, New Jersey.
Sayong naglabaw ang Heat gikan sa 10-0 run milabaw pa sila’g kapin 20 puntos didto sa fourth period ug bisan mi-apas makadiyot ang Nets ngadto sa nuybe puntos, 94-85 apan milampos gihapon sila pagkontrolar sa duwa aron maangkon ang ilang ika-walong kadaugan ug sila maoy nangu sa East sa ilang 8-1 nga baraha.
Midistansiya na og gamay ang Heat tungod sab sa pagkapilde sa Chicago Bulls kinsa miyukbo sa Atlanta Hawks, 94-109 aron modailos ngadto sa 7-2 nga baraha.
Miposa og 32 puntos si James, ang ika-unom nga sagunson nga higayon nga mi-iskor siya’g kapin 30 puntos nga nahimong usa ka record sa Miami franchise.
Si James kinsa daan nang may 22 puntos human sa first period, mirehistro sab og siyam ka assists ug pito ka rebounds.
Ang Nets kinsa bag-o lang midaug batok sa Boston Celtics, gipangulohan ni Kris Humpries pinaagi sa lain na sab niyang double-double sa iyang 25 puntos og 12 ka rebounds.
Wala kaayo makahuygo ang mga beteranong sila si Deron Williams, DeShawn Stevenson ug Jordan Famar alang sa Nets kung itandi sa mga kauban ni James nga sila si Chris Bosh, Udonis Haslem, Mario Chalmers,Joel Anthony ug Shane Battier.
Sa laing duwa, gilatos sa Indiana ang Charlotte, 99-77, gilubong sa New York ang Detroit, 103-80, naka-ipsot ang Oklahoma batok sa Houston, 98-95, gidemolis sa Philadelphia ang Toronto, 97-62, midaug ang San Antonio batok Denver, 121-117, midaug ang Dallas batok sa New Orleans, 96-81, midaug ang L.A. Clippers batok sa Milwaukee, 92-86 ug gipatapsingan sa Utah ang Golden State, 88-87. - NBA.com