CEBU, Philippines - Mideklara og gubat ang lima ka Pinoy boxers batok sa ilang mga langyaw'ng kaatbang sa 11th edition sa Pinoy Pride boxing series nga uloha'g "Philippines vs. The World" karong Enero 28 didto sa Waterfront Cebu City Hotel and Casino.
Pangulohan ni undefeated Milan 'El Metodico' Melindo, lima ka ALA Gym fighters andam na mohatag og dungog sa nasud ug garbo nila sa pakigsangka batok sa mga dekalibreng boksidor gikan sa nagkadaiyang dapit sa kalibotan.
"This is to continue what we have started in promoting and elevating Philippine boxing that has now reached its pinnacle," matud pa ni ALA Promotions president Michael Aldeguer atol sa press conference kagahapon didto sa Teatro Casino sa Waterfront Hotel.
"Bringing five different fighters from all around the globe to fight against our boxer, this is just the start in making Cebu the Las Vegas of Asia," dugang pa niya.
Timaan sa dungog nga ilang makab-ot, usa ka specially-designed trophy ang ihatag ngadto sa modaog tali sa Team Philippines ug sa mga langyaw.
Ang 23-anyos ug WBO Intercontinental flyweight champion nga si Melindo subling mopakita nga hinog na siya alang sa usa ka world title fight sa iyang pakigharong ni former Mexican world title challenger Juan 'Panterita' Esquer.
Nagtuo si Melindo nga ang kadaugan batok ni Esquer makapadaku sa iyang paglaum nga makakuha og world title shot karong tuiga.
"Andam na gyud ko kun mahatagan man og tsansa sa world title pero sa pagkakaron naa akong atensiyon ni Esquer, kinsa akong giisip nga lisud nga kontra," matud pa ni Melindo. "Dili ni siya (Esquer) kakompiyansaan kay musulod sad ug lig-on og panga."
Gawas ni Melindo, si undefeated knockout artist Lorenzo 'Thundervolt' Villanueva makigharong usab sa laing lig-ong Mexican boxer nga si Diego 'Tyson' Ledesma sa usa ka 10-round supporting bout.
Ang reigning Oriental ug Pacific Boxing Federation (OPBF) champion nga si Merlito 'Tiger' Sabillo mopakita usab sa iyang katakus sa undercard batok ni Indonesian champion Sofyan Effendi, samtang si Mhar Jhun Macahilig makigbinukbukay ni Thai Kaichon Sor Vorapin.
Ang kanhi national amateur standout nga si Joseph Von Minoza makigbatok ni South Korean brawler Yoo Shin Kim. (BANAT SPORTS)