8 mil ka runners na nagparehistro

CEBU, Philippines - Dul-an sa 8,000 ka runners ang gilaumang magdinaganay sa kadalanan sa pagsikad sa 3rd Cebu City Marathon, ang labing dakung lumba sa Kabisay-an karong Domingo didto sa Cebu IT Park.

Sa unofficial list sa mga registrants kagahapon, may 7,022 na ka runners ang nagpalista ug gipaabot nga mapun-an pa kini tungod sa mga late registrants nga mahimo pang makaparehistro hangtod sa adlaw'ng Biyernes.

Giklaro sa usa sa mga organizers nga si Meyrick Jacalan sa Cebu Executive Runners Club nga bugtong ang 5K na lang ang bukas alang sa niadtong gustong magparehistro tungod kay gihunong na ang pagpanawat og mga registrants sa 42K ug 21K run.

Sama sa miaging mga edisyon sa Cebu City Marathon, masaksihan na usab ang hugot nga kompetisyon sa 42K full marathon ug 21K half marathon.

Tutokan sa mga local elite runners ang pagkuros sa dalan nila ni reigning National Milo Marathon Queen Mary Grace de los Santos ug second placer sa miaging Cebu Marathon nga si Mary Joy Tabal.

Gawas sa mga local runners, makiglumba usab ang mga runners gikan sa Kenya, Norway, Germany, United Kingdom, Singapore, Japan, Hong Kong ug United States.

Sa iyang bahin, si Cebu City Mayor Michael Rama, kinsa mitambong sa press conference kagahapon mikompirmar nga modagan ubos sa 5K category.

Ang kampiyon sa 42K mouli bitbit ang P50,000, samtang sa 21K ug 5K mobulsa og P15,000 ug P10,000 matag usa. (BANAT NEWS)