MANILA, Philippines - Hindi na isasara ng Philippine Sports Commission (PSC) ang kanilang pintuan sa mga asosasyon na nais na tumulong para lumakas uli ang sports ng bansa.
Ang ginawang pagsuporta sa 1st Nikki Coseteng Swimming Cup kamakailan sa Rizal Memorial Swimming Pool ang simula ng pagbubukas ng pintuan ng PSC sa mga nagnanais na tumulong para makadiskubre ng mga bagong ta-lento na mapapakinabangan ng bansa.
“Ang PSC ay bukas para sa lahat ng nagnanais na tumulong,” wika ni PSC chairman Ricardo Garcia.
Ang dating patakaran ay tanging mga National Sports Associations (NSAs) na kinikilala ng Philippine Olympic Committee (POC) ang puwedeng gumamit ng pasilidad na pinangangalagaan ng PSC pero nag-iba ang pananaw ng PSC matapos ang 26th SEA Games.
Sa nasabing torneo sa Indonesia ay nabokya ang Pilipinas sa swimming na patunay na walang talentong nadiskubre ang Philippine Aquatics Swimming Association (PASA) habang namamayagpag ang Pilipinas sa SEAG mula 2003.
Si Mark Joseph ang pangulo ng PASA na patuloy na kinikilala ng POC bilang lehitimong miyembro.
“PASA is a member of the POC. Other groups though are welcome to develop their swimmers. We are for Philippine swimmers in general,” may paninindigan pang sinabi ni Garcia.
Nakasama pa ni Garcia si Commissioner Salvador Andrada na nakiisa at naggawad ng medalya sa mga nagsipanalo.
Pinasalamatan naman ng dating Senadora na si Coseteng ang pagtulong ng PSC na bukod sa pasilidad ay nagbigay din ng P100,000 para itulong sa kanilang mga gastusin.