Pajo kampiyon gihapon sa shakey's g-league

CEBU, Philippines - Yano kaayong gidemolis sa Pajo National High School (PNHS) ang karibal nga University of Southern Philippines Foundation (USPF) sa straight sets aron ugkaton ang "back-to-back" championships sa Cebu eliminations sa 9th Shakeys Girls Volleyball League kagahapon didto sa Aznar Coliseum.

Sa maong kalampusan, ang PNHS belles ni coach Fr. Rolando T. Manayon maoy nakakuha sa katungod nga morepresentar sa Sugbu alang sa Shakey's G-League National Finals nga gikatakda sa Marso 21-24 sunod tuig didto sa Davao City.

Ang PNHS belles nga gitimonan nilang Gretchel Soltones, Lovely Marie Murillo, Denice Francesca Lim, Mahattma Michelle Ares ug Mariel Gornez, mipulbos sa USPF sa first set, 25-16 ug nasundan og laing makabungog nga kadaugan, 25-10.

Ang gamhanang Pajo belles wala na molingi pa sukad niadto. Human niposte og 15-4, ang Pajo milusad og 6-0 nga rally aron ilubong ang USPF, 21-4. Ang USPF igo lang midugang og dos puntos paghuman sa duwa, 25-6.

"Our short set plays and taking huge score advantage powered our team to victory. I motivated my players to aim for the national title and we will still be using the same strategy in the national finals," sumala pa ni Manayon.

Lain pang nakatabang sa kadaugan sa PNHS mao sila si Danica Molinas, Apple Jean Roiles, Jessa Marie Jorquia, June Mae Ares, Jella Mae Jorquia, Flora Mae Coloscos ug Sweet Otero.

Ang PNHS belles nagpanikad na nga moharong sa mga lig-ong koponan gikan sa nagkalainlaing dapit sa nasud atol sa Nationals.

Atol sa crossover semis, ang PNHS midemolis sa Mandaue City Comprehensive National High School (MCCNHS) sa straight sets, 25-4, 25-10, 25-10, samtang ang USPF niagi una og kalisud sa wala pa nila pildiha ang St. Theresa's College (STC), 17-25, 25-21, 25-20, 16-25, 15-10.

Sa gubat alang sa ikatulong puwesto, ang STC mibuntog sa MCCNHS, 25-14, 25-22 kortesiya nilang Angelica Dela Cruz, Pauline Ogapong, Megan Fadriga, Paula Maninang, Nedel Mausisa and Julia Garcia.  (BANAT SPORTS)