Duha ka Visayas titles ilogan sa URCC

CEBU, Philippines - Dad-on na usab dinhi sa Sugbu ang labing dakung Mixed Martial Arts (MMA) tournament sa nasud, ang Universal Reality Combat Champions-Cebu 7 sa Enero 13 diha sa Cebu International Convention Center (CICC) sa Mandaue City.

Giuloha'g "Dominante," ang maong fight card naglatid sa duha ka Visayas championship fights nga mao ang pinweight ug bantamweight title.

Ang defending Visayas pinweight king nga si Victor Torre sa Bacolod City modepensa sa iyang bakus batok sa Sugbuanong si Geronimo Etac sa Yaw-Yan ArDigma.

Sama ni Etac, tuyo usab sa laing Sugbuanon nga si Carry Bullos sa SELDEF nga mailog ang titulo gikan sa kamot ni Visayan bantamweight titlist Rex De Lara sa Team Tinagan.

Sa laing bahin, atngan usab ang pag-away dinhi sa Sugbu ni International MMA sensation ug URCC welterweight king Eduard Folayang, kinsa mopakita sa iyang katakus batok sa wala pa mailhing kontra.  (BANAT SPORTS)