CEBU, Philippines - Milampos ang UTASSCO Utility ni Atty. Flor Yosores pagdepensa sa ilang korona human sila mo-iskor og 87-80 nga kadaugan batok sa Van System sa finals sa Power Forty Basketball Tournament-Christmas League niadtong Martes sa gabii didto sa Inayawan Sports Complex.
Sa sayo pa, giangkon sa Allyn & Sons ang ikatulong puwesto human ilang gipukan ang FC Fortune sa iskor nga 97-86.
Wala kapugngi sa Van System ang pagmangtas ni Julian Capala, kinsa maoy nimaneobra sa opensa aron pangulohan ang UTASSCO pinaagi sa iyang 27 puntos. Miabag sab si Wilbor Cabrera, kinsa mipabuto og 22 puntos ug si Alex Mercado miamot og 15 puntos.
Si Fernando Sumargo miratsada og 24 puntos aron sab pangulohan ang Van System, samtang sila si Danny Dayota ug Melvin Caumeran nagkumboya og 22 puntos.
Sa laing bahin, si Carding Vernaiz mikamada og 33 puntos alang sa Allyn & Sons, samtang laing lima niya ka teammates ang miiskor og double figures sa maong kadaugan.
Si Dodong Piezas ug Gogo Fuentes maoy nangu sa FC Fortune sa ilang 29 ug 24 puntos matag usa.
Gipahibalo ni commissioner Edwin Dejacto, nga ang awarding himuon karong Disyembre 30 dungan sa ilang Christmas party didto gihapon sa Inayawan Sports Complex.
PUNTOS MATAG USA
Unang duwa:
Allyn & Sons (97) - Vernaiz 33, Tabar 14, Bughao 14, Sandal 12, Lisondra 12, Arnado 10, Moniva 2
FC Fortune (86) - Piezas 29, Fuentes 24, Javierto 12, Kalinga 10, Lim 6, Navares 2
Ikaduhang duwa:
UTASSCO (87) - Capala 27, Cabrera 22, Mercado 15, Abarquez 8, F. Yosores 8, Tantay 3, Abasolo 2, Yosores 2
Van System (80) - Sumargo 24, Dayota 12, Caumeran 10, Genzon 8, Cabatas 7, Cabaluna 6, Labalan 6, Nacario 3 (BANAT SPORTS)