CEBU, Philippines - Nagpabiling walay pilde ang University of Southern Philippines Foundation (USPF) ug Mandaue City Comprehensive National High School (MCCNHS) sa 9th Shakey's Girls Volleyball League kagahapon didto sa Aznar Coliseum.
Ang USPF ni coach Thelma Datig mipukan sa University of Cebu (UC), 25-17, 25-16 kortesiya nilang Jacquelene Tadatada, Rose Marie Malagar, Dianne Padillo, Stephanie Alquitela, Sheena Abegail Quiño ug Danielle Panangin.
Sa wala pa ang ilang duwa, ang USPF mimakmak sa University of San Carlos (USC) sa straight sets, 25-19, 25-15.
Sa bracket A, ang defending champion Pajo National High School mipilde sa Southwestern University (SWU), 25-15, 25-10.
Sila si Gretchel Sollones, Lovely Marie Murillo, Denice Francesca Lim, June Mae Ares ug Mariel Gornez maoy responsabli sa kadaugan sa PNHS.
Sa laing duwa, ang University of Cebu (UC) ni coach Dolores Sagay mipukan sa Colegio dela Immaculada Concepcion (CIC)-main, 25-19, 25-17, samtang ang Don Gerardo Ouano Memorial National High School mipulbos sa Sacred Heart School (SHS)-Hijas de Jesus, 25-16, 25-17.
Ang kampiyon ning usa ka semana nga torneyo maoy morepresentar sa Sugbu alang sa Shakey's G-League National Finals unya sa Marso 22-24, 2012 didto sa Davao City. (BANAT NEWS)