CEBU, Philippines - Gitapos ni Pepo Rubi ang iyang kampanya sa 2011 MS Motosuit Motocross Series pinaagi sa pagtapos sa una ug ikaduhang dapit didto sa Sudtunggan racetrack sa Barangay Basak, dakbayan sa Lapu-Lapu.
Si Rubi nidominar sa pro open sa ikasiyam nga leg ning tinuig nga series nga giuloha'g "1st Barangay Captain Isabelito Darnayla Cup.
Napuhalan ni Rubi ang masaarong si John Flores alang sa unang dapit, samtang si Rex Barbaso miangkon sa ikatulo nga puwesto.
Gawas paghari sa pro open, si Rubi mipahiluna sa ikaduha sa experts division nga giharian ni Paulo Inoc. Mi-okupar sa ikatulo si Flores.
Bugtong si Mark Ganob ang miposte og duha ka daog ning maong lumba nga gipaluyohan sa Petron Philippines.
Si Ganob naghari sa intermediate ug novice open production. Gipilde niya silang Donkey Sanchez ug Martin Nuñez sa duha ka dibisyon.
Wala hinuon masirohi si Sanchez dihang iyang giangkon ang kampiyon sa iyang paboritong open enduro class pinaagi sa pagpilde nilang Rey Quirol ug Amay Amon.
Mao sab ngadto kang Quirol, kinsa nilangkat sa titulo sa local enduro batok nilang Dong Batiquen ug Jun Querol.
Mipahiluna sab si Quirol sa ikaduha sa beginners production nga gidominar ni Ayen Ledesma, samtang si Joguie Basco nalandig sa ikatulo.
Sa iyang bahin, si Basco nidaog sa underbone race, si June Enriquez naghari sa executive A, samtang si Russel Gungob sa executive B ug si Noli Rom sa executive C.
Si BJ Pepito maoy nag-una sa mini 65 cc. ug si Denmark Supatan sa mini 85 cc. class. (BANAT NEWS)