3-0, tuyo sa SCSIT, Ave Maria

CEBU, Philippines - Laraw sa defending champion Salazar Colleges of Science and Institute of Technology (SCSIT) Skyblazers ug Ave Maria Sanctuary Park nga mokulit og 3-0 sa ilang pakigsangka batok sa tagsa-tagsa nga kaatbang karong adlawa sa pagpadayon sa 2nd Cebu Basketball Association–M. Lhuillier Kwarta Padala Mayor’s Cup diha sa Cebu Coliseum.

Ang SCSIT Skyblazers ni coach Jojo Romarate moharong sa Southwestern University (SWU) Cobras sa alas-2 sa hapon, samtang ang Ave Maria makigsangka sa Rollway Customs Brokerage nga maoy main game sa alas-6 sa gabii human sa duwa tali sa ThreeSixty Pharmacy-Online Training Camp ug Asian College of Technology (ACT) Cyber Knights.

Ang SCSIT ug Ave Maria nga kasamtangang nagbitbit og 2-0 win-loss records, maninguhang modaog karon aron seguradong makasud sa final four.

Human nila gilubong ang ThreeSixty Pharmacy niadtong Lunes,111-94, ang Skyblazers mosandig pag-usab sa ilang high-scoring forward Mark Abadia uban ang laing UAAP standout nga si Earn Saguindel ug 6-foot-8 center Rino Berame.

Sa ilang bahin ang Cobras ni coach Raul 'Yayoy' Alcoseba andam usab mosumpo sa SCSIT aron makabawi human sa ilang 79-89 nga kapildihan sa kamot sa Rollway ni team owner Rolly dela Pieza.

Ang Ave Maria magsalig gihapon sa ilang veteran line-up nga gilangkuban nilang Jercules Tangkay, Alex Cainglet ug Ian Saladaga, samtang mobida sa Rollway mao sila si Eric Zanoria, Nat Cruz, Manny Gabas ug Ryan Alicaway.

Sa laing duwa, ang walay daog-daog nga teams ACT Cyber Knights ug ThreeSixty Pharmacy magsangka alang sa krusyal nga duwa sa alas-4 sa hapon. (BANAT NEWS)