Montealto sayong mipaundang ni Yu

CEBU, Philippines - Nagkinahanglan lang og usa ka minuto ug 30 segundos sa first round ang Batang Lacion nga si Ritchie Montealto aron paundangon si Raul Yu sa Talamban atol sa ilang sangka sa Summit Natural Drinking Water Amateur Boxing series didto sa Gaisano Countrymall carpark.

Daw nagdali si Montealto nga mahuman ang away kay mibuhi dayon kini og makabungog nga kombinasyon ngadto ni Yu, kinsa nagpunga-punga sa pagpanagang hinungdan nga giundang sa reperi ang away.

Midaog hinuon ang teammate ni Yu nga si Arnold Aubido batok ni Tiboy Ardiente.

Si Dann Lou Codilla sa University of the Visayas (UV) midaog pinaagi sa puntos batok ni Rey Morales sa Bacolod. Ang Japanese-Singaporean nga si Adam Taylor Campbel mipilde ni Renante Malunhaw sa Phil-Aust Boxing Club.

Lain pang nidaog mao sila si Raul Tarona, Reymond Rama, Jimboy Mayang, Richard Quilatan, Ferde San Roque ug Jason Formentera.  (BANAT SPORTS)