Gesta mibisita sa San Remigio

Init nga gisugat sa mga lumulupyo ug opisyal sa kagamhanan sa San Remigio si fast rising lightweight contender Mercito “No Mercy” Gesta.

Ang amahan ni Mercito nga si Anecito lumad nga taga-San Remigio. Si Mercito adunay impresibong 24-0, 12KOs record og nanghinaot nga moaway og world title sa US sunod tuig. (LPM)

Machida wa mutagam

Bisan pa og gipakatug siya sa katapusan nilang sangka, ang Brazilian nga si Lyoto ‘Dragon’ Machida naglaum gihapon nga makigrematch batok ni UFC light heavyweight king Jon ‘Bones’ Jones.

Si Machida pakyas pag-ilog sa bakus niadtong miaging semana human siya nadakpan og guillotine choke ni Jones og mipatug kaniya sa round 2 sa UFC 140. (LPM)

Unom gipilian sa Gila

Unom ka mga tang-ang coaches ang gipilian karon sa Samahang Basketbol ng Pilipinas (SBP) aron maoy mangulo sa kampanita sa Smart Gilas II.

Lakip sa mga gipilian mao ang kanhi coach sa Gilas nga si Rajko Toroman, Norman Black ug mga PBA coaches nga sila si Chot Reyes, Ryan Gregorio, Tim Cone ug Jong Uichico. (LPM)

Patriots mipabugnaw sa Heat

Gileksiyon sa Philippine Patriots ang Saigon Heat, 75-59, sa ilang duwa sa To Be Number One Basketball Challenge didto Nimibutr National Stadium sa Thailand .

Ang maong duwa magsilbe nga tune-up tournament sa Patriots kinsa laraw nga mokampiyon pagbalik sa 3rd season sa ASEAN Basketball League (ABL). (LPM)