CEBU, Philippines - Gigamit sa defending champion Salazar Colleges of Science and Institute of Technology (SCSIT) Skyblazers ang init nilang scoring run sa second half aron pildehon ang Rollway Customs Brokerage, 78-74, sa opening game sa 2nd Cebu Basketball Association –M.Lhuillier Kwarta Padala Mayor’s Cup kagahapon didto sa Cebu Coliseum.
Human sila mitukod og sayes puntos nga labaw sa halftime, 39-33, ang Skyblazers ni coach Jojo Romarate nagmintinar og double-digits lead sa wala pa sila mitukod sa labing daku nilang labaw nga 15 puntos, 57-42 sa third period.
Ang kanhi collegiate standout ug player sa M.Lhuillier Kwarta Padala Cebu Niños nga si Abadia midiga og 25 puntos ug maoy nangulo sa init nga atake sa Skyblazers batok sa Rollway.
Nabuhian og dugo ang Rollway sa katapusang tres minutos sa duwa human nila laslasi ngadto sa tres puntos, 67-70, ang labaw sa Skyblazers human sa tulo ka sunod-sunod nga tira ni Eric Sanoria.
Apan kadto na ang katapusang higayun nga nakasikit ang Rollway human sila bawsi sa SCSIT sa pagpangulo nila ni Abe Galinato ug Alano Caputolan kinsa miigo og tulo ka sunod-sunod nga jumpers.
Si Sanoria maoy nangulo sa Rollway sa iyang 20 puntos, samtang si Nat Cruz mitira og 14 puntos.
Puntos matag usa :
SCSIT (78) - Abadia 25, Caputolan 19, Labares 9, Berame 8, Galinato 6, Guangco 5, Garcia 2, Isidro 2, Saguindel 2
Rollway (74) – Sanoria 20, Cruz 14, Escosio 8, Tabaloc 10, Aguilar 8, Lumongsod 6, Alicaway 4, Gabas 2, Mendoza 2 (BANAT NEWS)