CEBU, Philippines - Pormal nga gilusad sa University of Southern Philippines Foundation (USPF) ang ilang 1st USPF Alumni and Friends Run nga gikatakda sa Pebrero 11, 2012 diha sa USPF football field sa Brgy. Lahug, ning siyudad.
Gawas sa paghinumdum sa mga nangaging alumni sa maong unibersidad, tumong sa lumba mao ang pagtigom og salapi alang sa gipatungha nilang scholars.
"The purpose of the run is to augment our USPF alumni funds for the scholars of the school," matud pa ni USPF Alumni president James R. Yu atol sa press conference kagahapon didto sa Rizal Hall sa USPF Lahug campus.
Sama sa mga elite ug fun runners, gidasig usab sa mga USPF Alumni ang ilang mga tinun-an nga aktibong motabang sa ilang kalihukan.
Ang lumba gibahin sa tulo ka kategoriya nga mao ang 12k, 6k ug 3k fun run
"We want to provide quality education for poor students as well as give financial help to our brothers and sisters," dugang pa ni Yu.
Sa iyang bahin, usa sa labing sikat nga alumnus sa USPF nga si Cebu City Mayor Michael Rama misaad nga modagan sa maong lumba agi'g pagpakita sa iyang suporta sa iyang kanhi tunghaan.
"I will join the event. I will never forget my roots, USP will always be here in my heart," matud pa niya.
Kapin sa P20,000 nga ganting salapi ug medalya ang gigahin alang sa top ten finishers sa matag kategoriya.
Ang registration fee nagkantidad og P250 alang sa mga tinun-an ug P300 sa mga regular runners. Ang registration sites nahimutang sa USPF Lahug ug Mabini Campus ug Chris Sports sa SM City-Cebu ug Ayala Mall. (BANAT NEWS)